Вакцина

ZF-UZ-VAC2001 вакцинасининг III фаза тадқиқотлари натижалари эълон қилинди

Хитой Фанлар Академияси, Anhui Zhifei Longcom Biopharmaceutical Co. компанияси  ҳамда Ўзбекистон олимлари жамоаси  ҳаммуаллифлигида яратилган коронавирусга қарши ZF-UZ-VAC2001 рекомбинанант вакцинасининг III фаза синовлари натижаларининг дастлабки статистик таҳлиллари якунланди.

Вакцинанинг III фаза халқаро кўпмарказли клиник тадқиқотлари 2020 йилнинг 10 декабридан бошланган бўлиб, 18 ёшдан катта бўлган жами 29 000 нафар кишини қамраб олди. Мазкур тадқиқотларда Хитойнинг Хунан провинциясида, шунингдек Ўзбекистон, Индонезия, Покистон ва Эквадор давлатларида ўтказилди. Кўнгиллилар вакцина билан 0,1,2 ой оралиғида 3 дозада эмландилар. 2021 йилнинг 30 июнь санасига келиб жами 28 500 нафар кўнгилли рўйхатдан ўтказилган бўлиб, улардан 14 249 нафари вакцина ва 14 251 нафари плацебо олганлги қайд этилган. Мазкур кўнгиллилардан 647 нафарида касаллик аниқланди, улардан 221 нафарида касаллик 3 та доза вакцина олгандан сўнг 7 кундан кейин аниқланди. (Жаҳон соғлиқни сақлаш ташкилоти протоколига кўра 156 ҳолда касаллик аниқланиши керак.)

Дастлабки статистик таҳлил тўлиқ вакцинациядан 7 кун кейин касалланганларнинг 35 нафари вакцина билан, 186 нафари плацебо билан эмланганини кўрсатди. Бу вакцинанинг 81,76% самарали эканини англатади. ЖССТ талабларига кўра вакцина камида 70 фоиз самара бериши лозим. Шунингдек, ZF-UZ-VAC2001 вакцинаси билан эмланганлар орасида касалликнинг оғир шакли билан оғриганлар ёки ўлим ҳолатлари қайд этилмади.

ZF-UZ-VAC2001 вакцинасининг Ўзбекистондаги клиник синовларига келадиган бўлсак, клиник тадқиқотлар Zhifei Longcom Biopharmaceutical Co.Ltd компаниясининг 8 нафар мутахассиси, Инновацион ривожланиш вазирлиги ҳузуридаги Илғор технологиялар марказининг 30 нафар олими, Соғлиқни сақлаш вазирлиги ҳузуридаги Вирусология илмий-тадқиқот институти ва бошқа тиббиёт муассасаларининг 112 нафар тиббиёт ходимлари томонидан ўтказилди.

Клиник тадқиқотларда Ўзбекистондан жами 6966 нафар кўнгилли иштирок этди, улардан 214 нафари 60 ёшдан катта кишилардир. Тадқиқотлар давомида ҳар бир кўнгилли иштирокчи 28 кун оралиғи билан 3 та дозада «вакцина/плацебо» схемасида эмланди. Улардан 13 кишида ўрта даражадаги ножўя таъсир аниқланган бўлиб, бу 1 фоиздан кам кўрсаткичдир. Алоҳида ажратилган гуруҳларда 95 фоиз ҳолатларда етарли даражада антитаналар ишлаб чиқарилгани аниқланди.

Жорий йилнинг 27 март кунидан кўнгиллилар орасида COVID-19 касаллигига чалинганлар аниқлана бошлади. 232 нафар кўнгиллида ПЗР тест мусбат натижа кўрсатган бўлса, улардан 52 нафар киши касалликнинг ўрта шакли билан оғриди. Мусбат ПЗР тестлар намуналари британча штамм мавжудлигига текширилди.

20 август куни хитойлик ҳамкорлар томонидан вакцина ва плацебо гуруҳлари бўйича маълумотлар очилди, натижаларнинг статистик қайта ишлаш касал бўлганларнинг 81,76 % плацебо гуруҳида эканини, қолган 18,24 %  касал бўлганлар эса вакцинанинг 3 та дозасини олганини кўрсатди.

Штаммлар генетикаси бўйича тадқиқотлар, ZF-UZ-VAC2001 вакцинаси барча штаммлар учун умумий 81,76%, Alpha (“британча”) штаммига қарши 92,93%, Delta (“ҳиндча”) штаммига қарши 77,54% самарадорлигини намойиш этди.

Маълумот учун, Pfizer вакцинасининг самарадорлиги 85%, AstraZeneca 68% экани, Moderna вакцинаси эса «бирламчи» штамм (Уханча) учун юқори самарадорликни кўрсатиб (94%), Delta штамм учун 76% гача пастлагани илмий адабиётларда қайд этилган.

Мазкур тадқиқот шунингдек вакцинага бўлган инсон организмининг реакцияси вакцина ва плацебо олганлард афарқ қилмаганини кўрсатди. Шундай қилиб, клиник тадқиқотлар натижаси Хитой-Ўзбекистон ҳаммуаллифлигида яратилган ZF-UZ-VAC2001 вакцинаси аҳолига коронавирус юқишининг олдини олиш ва хавфсизлик жиҳатдан самарали эканини тасдиқлади.

Коронавирусга қарши ZF-UZ-VAC2001 вакцинасининг 3 фаза клиник синовлари натижалари Хитойлик ҳамкорлар томонидан жорий йилнинг 27 август куни Хитой фонд бозорида эълон қилинди

(https://finance.sina.com.cn/stock/hkstock/ggscyd/2021-08-27/doc-ikqciyzm3989468.shtml).