Contests

Илмий фаолиятга оид давлат дастурлари доирасидаги амалий ҳамда инновацион лойиҳалар танловининг 7,17, 18-турлари қайта эълон қилинади

Инновацион ривожланиш вазирлиги илмий фаолиятга оид давлат дастурлари доирасида бажарилиши уч йилга мўлжалланган амалий ҳамда бажарилиши икки йилга мўлжалланган инновацион лойиҳалар танловининг 7, 17, 18-турларини қуйидаги фан йўналишлари бўйича қайта эълон қилади.

  1. Фармакология ва фармацевтика фанлари.
  2. Филология, педагогика ва психология фанлари.
  3. Биотехнология ва биология фанлари.
  4. Тарих ва археология фанлари.

Танлов шартлари

Мазкур танлов Ўзбекистон Республикаси Вазирлар Маҳкамасининг “Илмий-тадқиқот ва инновацион фаолиятни ривожлантиришнинг норматив-ҳуқуқий базасини янада такомиллаштириш чора-тадбирлари тўғрисида” 2020 йил 9 мартдаги 133-сон қарорида белгиланган талабларга мувофиқ ўтказилади.

Коронавирус пандемияси сабабли республикамизда эълон қилинган карантин шароитида лойиҳалар www.fan-portal.uz веб-саҳифаси орқали 2021 йилнинг 1 мартига қадар фақат электрон шаклда қабул қилинади.

Бунда қуйидаги ҳужжатларнинг асл нусхалари сканердан ўтказилиб, pdf шаклида www.fan-portal.uz веб-саҳифасига юкланиши лозим:

  • ижрочи ташкилот раҳбари (ўринбосари) томонидан имзоланган йўлланма ҳат;
  • ижрочи ташкилотнинг илмий (илмий-техник) кенгаши қароридан кўчирма;
  • амалий ёки инновацион лойиҳа матни (имзо ва муҳр қўйилган ҳолда).

Лойиҳа матни А4 форматдаги стандарт қоғоз варағининг икки томонида жойлашиши ва қоида тариқасида 1,15 қатор оралиғида ёзилиши лозим. Ҳар бир бет юқоридан ва пастдан 2 см; чапдан 3 см; ўнгдан 1,5 см ҳошияга эга; хатбоши 1,27 см га тенг ва бир хилда бўлиши лозим.

Матнни тайёрлашда “Тimеs Nеw Rоmаn” 12 ўлчамли шрифтда “Мiсrоsоft Wоrd” матн редакторидан фойдаланиш тавсия қилинади.

Бетлар титуль варағидан бошлаб охирги вараққача изчил кетма-кетликда рақамланади. Бетнинг тартиб рақами варақнинг пастки ўнг бурчагида 2 рақамидан бошлаб ёзилади. Титуль варағига 1 рақами қўйилмайди.

Лойиҳанинг ҳар бир талаб қилинган ҳужжати ва бошқа таркибий қисмлари янги бетдан расмийлаштирилади.

Лойиҳа раҳбари ва иштирокчиларининг мезонларда талаб қилинган илмий ишлар рўйхати (охирги 5 йил давомидаги нашрлар қуйидаги хронологик тартибда келтирилиб, изчил кетма-кетликда рақамланади: монография; патент; илмий мақола; илмий тўпламлар ва бошқа нашрлари) 3.4-шаклга қатъий риоя қилинган ҳолда расмийлаштирилади ва муаллиф, илмий котиб томонидан имзоланиб, ташкилот муҳри билан тасдиқланади.

Барча тақдим этилган илмий лойиҳалар мажбурий равишда танлов талабларига қатъий риоя қилинганлиги, лойиҳа материалларининг ишончлилиги ва ҳаққонийлиги, кўчирмачиликка (плагиат) йўл қўйилмаганлиги, талаблар асосида шакллантирилганлиги бўйича дастлабки техник экспертизадан ўтказилади.

Дастлабки техник экспертизадан ўтмаган лойиҳалар танловнинг кейинги босқичига тавсия этилмайди.

Ўзбекистон Республикаси Президентининг 2018 йил 18 июлдаги ПҚ-3855-сон қарорига мувофиқ, илмий фаолиятга оид давлат дастурлари доирасида бажарилган амалий ва инновацион тадқиқотлар натижалари улар якунланганидан сўнг тўлиқ тижоратлаштирилиши шарт.

Тақдим этилган лойиҳалардаги маълумотларнинг ҳаққонийлиги ва ишончлилиги ҳамда танлов ғолиблари томонидан илмий-техник лойиҳаларнинг натижадорлиги, тижоратлаштириш даражаси, кутилаётган натижаларни тўла ва ўз вақтида сифатли бажарилишига илмий лойиҳалар раҳбарлари ва илмий лойиҳани бажарувчи ташкилот раҳбарлари жавобгар ҳисобланадилар.

Эслатма: Танловга тақдим этилган лойиҳаларнинг натижалари тўғрисидаги маълумот www.mininnovation.uz веб-сайтида “Танловлар” рукнининг “Танлов натижалари” интерактив хизмати орқали тақдим этиб борилади. www.fan-portal.uz веб-портали орқали электрон рўйхатдан ўтказиш билан боғлиқ техник масалалар бўйича Инновацион ривожланиш вазирлигининг қўллаб-қувватлаш хизматига қўнғироқ қилишингиз мумкин: (90) 993-99-32.